السلام عليكم ورحمة الله وبركاته

اللهم لك الحمد…اللهم لك الحمد…اللهم لك الحمد

انه في يوم الثلاثاء الموافق 22 من مايو للعام السابع بعد الألفين تم قبولي للعمل في شركة برمجيات بالمهندسين

الحمد لله الفترة اللي فاتت الواحد كان قاعد من غير شغل بس يقيني إن ربي هيكرمني بشغل في مكان كويس كان موجود

يا رب الشغل يفيدني كتير ( علميا وماديا ) وميقفش قدام موضوع دروس ال PHP اللي انا شغال فيها

وبالمناسبة دي أحب أبعت سلامي لجدو وتيتا وبابا وماما وخالة بهية وجميع أصدقاء البرنامج وأهدي لهم التاج اللي بعتهوللي أخويا كريم  ومستني التهاني  : وش سعيد جدا : وكمان :وش مسنتح:

أحب شخص لقلبك في الدنيا؟

- أكيد أكيد أكيد الوالدة وبعد كده بابا وإخواتي

انسان مستعد تضحي بحياتك – ركز فى كلمة حياتك – عشانه؟
- برضه الوالدة ونفس الترتيب السابق

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
- ولو إن السؤال ده اللي حاطه شكله مغلول قوي من حد…بس انا الحمد لله مبعرفش أكره….هي حاجة كويسة بس ليها مشاكل فنية برضه في حياتنا اليومين دول..مممم بس

ما هو اسم اجمل كتاب كتبه بشر قراته ومحتفظ به حتي الان؟
- رياض الصالحين للإمام النووي

اسم كتاب كتبه بشر برضة- انت متعلق بيه وبتقرأه كل فترة؟

- موضوع أقرأه كل فترة دي مش كتير بس ممكن نقول كتاب علو الهمة للشيخ محمد إسماعيل ( مش طبيعي الكتاب ده)

اهم جهاز منزلى انت متعلق بيه او بتستخدمه كتير؟

- أكيد الكمبيوتر (بلامبي ) وييجي بعده على طول الكابيـ… 

مكان تحس بالراحة عندما تدخله؟
- المسجد  ….. ( إحساس مش طبيعي وانت داخله ) .انا فهمت السؤال على انه إحساس بالراحة النفسية انما لو الراحة التانية مفيش غير الحمام :)

شىء تحس بالراحة النفسية عندما تنظر اليه؟

- المصحف …البحر بالليل

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
- أولا انا مشترك مع كريم في إحساسي بالحنين إلى مونبيلييه المدينة اللي اتولدت فيها (وشكل الواحد مش هيروح هناك تاني للأسف) حاسس وانا هنا في مصر اني لو رحت هحس وهفتكر حاجات كتير من وانا صغير لما كنت هناك :وش مرتبك: بس عادي يعني مكان وخلاص

اجمل مدينة زرتها داخل مصر ؟
- مش مدينة بس قرية الجونة(قبل الغردقة ب 20 كم ) .. تحس انك في لعبة مش في الحقيقة ..مكان غريب مش في مصر تقريبا بس حاسب من الأجانب خليك بعيد.

أجمل مكان طبيعي رأيته داخل مصر ؟
- منظر النيل عند الغروب في أسوان

شخصية كارتونية بتحبه؟

- مش فاكر قوي بس ممكن نقول شكوكو  وبحب أشوف Road Runner بيب بييب

نوع هاتفك المحمول؟
- لو جاز لي ان اسميه محمول يبقى نوكيا وبلاش الموديل عشان الإحراج

سرعة بروسيسور جهازك؟

- 3.4 جيجا هرتز … كاش 4 ميجا ( مش عايزين نق )

حجم ذاكرة –هارد- جهازك؟
- 1 جيجا رامات – 80 جيجا هارد

المساحة التى تشغلها المواد الاسلامية على جهازك ؟

- مش لازم أقول.

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

- :) هع هع هههع

أهم هدف انت واضعه لحياتك الآن؟
- والله يا جماعة مفيش هدف أسمى من رضى الله عز وجل عني …بعديه بكتير اني أكون مبرمج ايه حكاية كده  :)

مواصفات فتاة الأحلام بالنسبة لك؟

- ملتزمة ( تيجي بنقابها من الآخر معنديش حاجة اسمها تيجي وبعدين تنتقب)… غلبانة (ملهاش تطلعات غريبة) …ذكية (مبحبش الغباااااء)…ومن أهم الحاجات تتقي الله في أمي

صف ما يأتى:شعورك لما بتسمع كلمة مصر ؟

- بحس بنفسي …فيا خير كتير بس مضحوك عليا

شعورك لما بتسمع كلام عن اليهود؟
- #%بوم ؟&##طاخ طيخ …..فسسسسس

شعورك لما بتشوف ظابط شرطة؟

- ممممم ربنا يحميه ويهديه وأدعي يكون زي الصورة اللي اللمفروض يكون عليها (حلوة الإجابات السياسية)

شعورك لما بتشوف الكناس العجوز فى الطريق؟

- ربنا يرزقه ويكرمه ولو أولاده كبار ومستعرين منه ..مش عارف أقول ايه بس ربنا يهديهم ويعرفوا قيمة الأب.

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
- انت بتتكلم عني ولا ايه  …ربنا يحميه ويثبته  بس حاسب ليكون جامي ولا حاجة…كالعادة ايماءة بالرأس مع إلقاء السلام أو رده حسب اللي يلحق

احساس يراودك فى اشارة مرور مغلقة بسبب مسئول كبير؟

- عادي هي دي يعني اللي هتغيظني…طب ما كل حاجة…..إحم إحم بلاش كلام في السياسة قلنا.

وبكده نكون خلصنا أول تاج يتبعتلنا ومش عارف أمرر لمين التاج بس لما أعرف ناس كده أبقى أبعتلهم بإذن الله

دمتم بعافية ومتنسوش التهاني بمناسبة الشغل ومفيش عزومات حاليا ( أما أقبض طيب الأول )

السلام عليكم ورحمة الله وبركاته…
ولو ان المدونة لسه جديدة…والرجل(بتشديد وكسر الراء ) لسه عليها مش كتير
لكن هعمل ايه بقى…اتخنقت من البواب و الباشا رئيس مجلس إدارة العمارة
وقلت انفس عن نفسي هنا…..ده حرام يا جدعااااااااااااان
انا كنت أخدت شقة ايجار وخلاص….مدام التمليك برضه حيطلع عينك في المصاريف فيه
إحسب معايا كده يا غالي ……
20 جنيه : الباشا البواب ( نفسي يعمل حاجة يحلل بيها الفلوس دي ) مبسمعش صوته غير أول كل شهر : وش سمج :
25 جنيه : نور سلم ومياه وأسانسير (رغم اني مش مشترك فيه)
10 جنيه : نور الشقة
4 جنيه : غاز
—————————————-
يبقى المجموع : 59 جنيه قول ستين جنيه
طبعا يا جماعة كل ده انا قاعد لوحدي ( وحييييييييد)
يعني بدفع ستين جنيه في الشهر كده…في الهوا
طيب انا أدفع ليه زي اللي قاعدين 5 أو 6 في شقة واحدة
هو انا استهلاكي زيهم؟؟؟؟!!!!!!!
ثم انا معنديش مصدر دخل…مبشتغلش حاليا….من الآخر باخد مصروفي من الحاج(ربنا يمد في عمره بالخير)
طيب الناس دي مش تراعي الظروف….ولا ايه….ولا لازم الواحد يكون قليل الأدب عشان يفهموا

انتش ملكشي فلوووس عندشي…وأعلى ما فخيلهم …….

السلام عليكم ورحمة الله وبركاته

مش عارف أبدأ أقول ايه!!!!!

عارفين اما الواحد يبقى عايز يقول كلام كتير وميقدرش ينقي منهم حاجة.

المهم كان لازم أعملي أي منظر في أول يوم أعمل فيه المدونة.

انا بس بدعي ربنا ييسر الحال وأقدر من خلال هذه المدونة اني أفيد أي حد..إن شاء المولى عز وجل

على العموم انا هقول تقريبا المدونة هتكون عن ايه……

أول حاجة …هيكون فيها أخبار عامة عن العبد لله والبيئة المحيطة …يعني زي أي مدونة يا جماعة

تاني حاجة… هيكون فيها أخبار عن البرمجة..ممكن كمان أكتب شرح لبعض الحاجات من تأليفي أو ترجمة لحاجة غربية

آخر حاجة … مواضيع دينية…بس مش هيكون الموضوع متوسع..حاجة صغننة كده نفكر فيها  مع بعض …

بـــــــــــــــــــــــــــــــس كده تعبت……تو بي كونتينيود